യുവതിയെ മരത്തില്‍ ചങ്ങല കൊണ്ട് കെട്ടിയിട്ട നിലയില്‍
മുംബൈ: വനമേഖലയില്‍ യുവതിയെ മരത്തില്‍ ചങ്ങല കൊണ്ട് കെട്ടിയിട്ട നിലയില്‍ കണ്ടെത്തി. മഹാരാഷ്‌ട്രയിലെ സിന്ധുദുർഗ് ജില്ലയില്‍ ശനിയാഴ്ച വൈകുന്നേരമാണ് ആടിനെ മേയ്‌ക്കാനായി എത്തിയ പ്രദേശവാസികള്‍ വിദേശ വനിതയെ മരത്തിൽ കെട്ടിയിട്ട നിലയിൽ കണ്ടെത്തിയത്.
ഇവരുടെ പോക്കറ്റില്‍ നിന്നും യുഎസ് പാസ്‌പോർട്ടിന്റെ ഫോട്ടോകോപ്പിയും തമിഴ്‌നാട് വിലാസമുള്ള ആധാർ കാർഡും ചില മരുന്ന് കുറിപ്പടികളും കണ്ടെടുത്തതായി പൊലീസ് ഉദ്യോഗസ്ഥർ പറഞ്ഞു. കിട്ടിയ രേഖകള്‍ പ്രകാരം ലളിത കയി എന്നാണ് ഇവരുടെ പേരെന്നും പൊലീസ് അറിയിച്ചു. മാനസിക അസ്വാസ്ഥ്യം പ്രകടിപ്പിച്ച യുവതിയെ ഗോവ മെഡിക്കല്‍ കോളേജിലേക്കും കൊണ്ടു പോയി.
read also: അഞ്ച് ജില്ലകളില്‍ ഓറഞ്ച് അലര്‍ട്ടും ഒന്‍പത് ജില്ലകളില്‍ യെല്ലോ അലര്‍ട്ടും
ആടിനെ മേയ്‌ക്കാനായി എത്തിയ പ്രദേശവാസികള്‍ യുവതിയുടെ കരച്ചില്‍ കേട്ട് പൊലീസിനെ വിവരം അറിയിക്കുകയായിരുന്നു. ദിവസങ്ങളോളം ഭക്ഷണമില്ലാതെ തുടർച്ചയായ മഴ കൊണ്ട് അവശനിലയിലായിരുന്നു ഇവർ എന്നും റിപ്പോർട്ട്. എത്ര നാളായി ഇവരെ കാട്ടില്‍ കെട്ടിയിട്ടിട്ടെന്ന് വ്യക്തമല്ലെന്നും ഭർത്താവാകാം സംഭവത്തിനു പിന്നിലെന്നും പൊലീസ് പറഞ്ഞു.