സുനിത കെജ്‌രിവാൾ അടുത്ത ഡൽഹി മുഖ്യമന്ത്രി?
ന്യൂഡൽഹി: ഡൽഹി മുഖ്യമന്ത്രി അരവിന്ദ് കെജ്‌രിവാളിൻ്റെ ഭാര്യ സുനിത ഭർത്താവിൻ്റെ സ്ഥാനം ഏറ്റെടുക്കാൻ ഒരുങ്ങുന്നതായി കേന്ദ്രമന്ത്രി ഹർദീപ് സിങ് പുരി. സുനിത തൻ്റെ സഹപ്രവർത്തകരെ ഒറ്റപ്പെടുത്തി എന്നും മാഡം സ്ഥാനം ഏറ്റെടുക്കാൻ ഒരുങ്ങുകയാണ് എന്നും സുനിതയ്‌ക്കെതിരെ ആഞ്ഞടിച്ച് ഹർദീപ് പുരി പറഞ്ഞു. ബിഹാറിൽ റാബ്‌റി ദേവിയും ഇത് തന്നെയായിരുന്നു ചെയ്തതെന്നും അദ്ദേഹം ചൂണ്ടിക്കാട്ടി. അരവിന്ദ് കെജ്‌രിവാളിനെ എൻഫോഴ്‌സ്‌മെൻ്റ് ഡയറക്ടറേറ്റ് അറസ്റ്റ് ചെയ്തതിന് ശേഷം സുനിത കെജ്‌രിവാൾ തൻ്റെ ഭർത്താവ് മാധ്യമങ്ങളോട് സംസാരിച്ച അതേ കസേരയിൽ നിന്ന് പത്രസമ്മേളനങ്ങൾ അഭിസംബോധന ചെയ്തുവെന്നും അദ്ദേഹം പരിഹസിച്ചു.
റാബ്‌റി ദേവിയുടെ പാത പിന്തുടരുമെന്ന് കേന്ദ്രമന്ത്രി അനുരാഗ് താക്കൂർ സൂചന നൽകിയതിന് തൊട്ടുപിന്നാലെയാണ് സുനിത കെജ്‌രിവാൾ മുഖ്യമന്ത്രിയാകുമെന്ന ഹർദീപ് സിംഗ് പുരിയുടെ അവകാശവാദം. കാലിത്തീറ്റ കുംഭകോണത്തിൽ ലാലു പ്രസാദ് യാദവ് കുടുങ്ങിയപ്പോൾ റാബ്‌റി ദേവി പ്രഖ്യാപനങ്ങൾ നടത്താറുണ്ടായിരുന്നുവെന്നും പിന്നീട് ക്രമേണ കസേരയിൽ പിടിമുറുക്കിയെന്നും അനുരാഗ് താക്കൂർ പറഞ്ഞു. ഭർത്താവ് ലാലു പ്രസാദ് യാദവ് അഴിമതിക്കേസിൽ ജയിലിലായതിനെ തുടർന്നാണ് 1997ൽ റാബ്‌റി ദേവി ബിഹാർ മുഖ്യമന്ത്രിയായത്.
അതേസമയം, അരവിന്ദ് കെജ്‌രിവാളിനെതിരെ ആഞ്ഞടിച്ച ഹർദീപ് സിംഗ് പുരി, താൻ ഒരിക്കലും മദ്യശാലകൾ തുറക്കില്ലെന്ന് എഎപി മേധാവി പറഞ്ഞിട്ടുണ്ടെന്നും എന്നാൽ നിലവിൽ മദ്യ അഴിമതിയിൽ ഏർപ്പെട്ടിട്ടുണ്ടെന്നും പറഞ്ഞു. എൻഫോഴ്‌സ്‌മെൻ്റ് ഡയറക്ടറേറ്റ് ഒമ്പത് തവണ സമൻസ് അയച്ചിട്ടും കെജ്‌രിവാൾ അന്വേഷണത്തിൽ പങ്കെടുത്തില്ലെന്നും അദ്ദേഹം നിരീക്ഷിച്ചു. ‘അണ്ണാ ആന്ദോളൻ’ സമയത്ത് അരവിന്ദ് കെജ്‌രിവാൾ അഴിമതിയുണ്ടാകില്ലെന്ന് പറഞ്ഞിരുന്നു. എന്നാൽ ഇപ്പോൾ അത് ഏറ്റവും അഴിമതി നിറഞ്ഞ പാർട്ടിയുമായി ബന്ധപ്പെട്ടിരിക്കുന്നുവെന്നും ഹർദീപ് സിംഗ് പുരി പറഞ്ഞു.