ഓസ്കാർ ചുരുക്കപ്പട്ടികയില്‍ നിന്ന് ആടുജീവിതത്തിലെ രണ്ട് പാട്ടുകളും പുറത്തായി
ന്യൂയോർക്ക് : ആടുജീവിതത്തിലെ രണ്ട് പാട്ടുകളും ഓസ്കാർ ചുരുക്കപ്പട്ടികയില്‍ നിന്ന് പുറത്തായി. എ.ആര്‍ റഹ്‌മാന്‍ ഒരുക്കിയ പാട്ടുകളാണ് ഓസ്കാർ അന്തിമ പട്ടികയില്‍ നിന്ന് പുറത്തായത്.
ചിത്രത്തിലെ രണ്ട് ഗാനവും പശ്ചാത്തല സംഗീതവും പ്രാഥമിക പട്ടികയില്‍ ഇടം പിടിച്ചിരുന്നുവെങ്കിലും, ചൊവ്വാഴ്ച അക്കാദമി ഓഫ് മോഷന്‍ പിക്ചര്‍ ആന്‍ഡ് ആര്‍ട്‌സ് 10 വിഭാഗങ്ങളിലെ ഷോര്‍ട് ലിസ്റ്റ് പുറത്തു വന്നപ്പോൾ ആടുജീവിതത്തിലെ ഗാനങ്ങള്‍ ഉണ്ടായിരുന്നില്ല.
86 ഗാനങ്ങളും 146 സ്‌കോറുകളുമാണ് ഓസ്കാർ പുരസ്‌കാരത്തിന്റെ പ്രാഥമിക പട്ടികയില്‍ ഇടം പിടിച്ചിരുന്നത്. ഒറിജിനല്‍ സ്‌കോര്‍ വിഭാഗത്തിലും ഗാന വിഭാഗത്തിലുമായിരുന്നു ആട് ജീവിതത്തിന്റെ പ്രാഥമിക പട്ടിക. ഒറിജിനില്‍ സ്‌കോര്‍ വിഭാഗത്തില്‍ ഫെഡി അല്‍വാറസ് സംവിധാനം ചെയ്ത എലിയന്‍ റോമുലസ് ഉള്‍പ്പെടെ 20 സിനിമകള്‍ ഇടംപിടിച്ചു.
15 ഗാനങ്ങളാണ് സംഗീത വിഭാഗത്തില്‍ ഇടം പിടിച്ചത്. കഴിഞ്ഞ വര്‍ഷത്തെ അപേക്ഷിച്ച് പാട്ടുകളുടെ പട്ടികയില്‍ അഞ്ചെണ്ണം കുറവായിരുന്നു. ഡിസംബര്‍ ഒമ്പതിന് ആരംഭിച്ച വോട്ടിങ് 13-ന് ആണ് അവസാനിച്ചത്.