ഫോണ്‍ ഞാന്‍ പൊളിക്കും, ആരാധകരോടു തട്ടിക്കയറി നയന്‍താര
ക്ഷേത്ര ദര്‍ശനത്തിനെത്തിയ തനിക്ക് ചുറ്റും കൂടിയ ആരാധകരോടു തട്ടിക്കയറി നയന്‍താര. ഭര്‍ത്താവ് വിഘ്നേഷ് ശിവനൊപ്പമാണ് കുംഭകോണത്തിനു സമീപമുള്ള മേലവത്തൂര്‍ ഗ്രാമത്തിലെ പുഴയോരത്തെ കാമാച്ചി അമ്മന്‍ ക്ഷേത്രം നയന്‍താര സന്ദര്‍ശിച്ചത്. താരത്തെ കാണാനായി നിരവധി ആരാധകരാണ് തടിച്ചുകൂടിയത്.
ഇതോടെ സമാധാനത്തോടെ ക്ഷേത്ര ദര്‍ശനം നടത്താന്‍ നയന്‍താരയ്ക്ക് കഴിഞ്ഞിരുന്നില്ല. ആൾക്കൂട്ടത്തെ നിയന്ത്രിക്കാൻ പൊലീസിനു കഴിയാതെ വന്നതോടെ അവിടെയുള്ളവരോട് അൽപനേരം ശാന്തരായിരിക്കാൻ വിഘ്നേഷ് ശിവൻ ആവശ്യപ്പെട്ടു. അമ്മന്‍ ക്ഷേത്രത്തിലെ പൂജകള്‍ പൂര്‍ത്തിയാക്കിയ ശേഷം ഇരുവരും അടുത്തുള്ള മറ്റൊരു ക്ഷേത്രത്തിലേക്ക് പോയി. പിന്നീടു റെയില്‍വേ സ്റ്റേഷനിലെത്തി ട്രെയിനിൽ കയറിയ നടിയെ പിന്തുടര്‍ന്ന് ആരാധകരും പാപ്പരാസികളും എത്തി. അതോടെ നയന്‍താര വീണ്ടും ദേഷ്യപ്പെട്ടു. വിഡിയോ പകര്‍ത്തിയ ഒരാളോട് താന്‍ സെല്‍ഫോണ്‍ തകര്‍ക്കുമെന്നും നയന്‍താര മുന്നറിയിപ്പു നല്‍കി.
ഇതിനിടെ, താരത്തിനൊപ്പം സെല്‍ഫി എടുക്കവെ ആരാധകരില്‍ ഒരാള്‍ നയന്‍താരയുടെ തോളില്‍ പിടിക്കുന്നതും നയൻതാര കൈ തട്ടി മാറ്റുന്നതുമായ വീഡിയോയും സമൂഹമാധ്യമങ്ങളിൽ വൈറലാണ്. അതേ സമയം പലര്‍ക്കും തങ്ങള്‍ക്കൊപ്പം സെല്‍ഫി എടുക്കാന്‍ നയന്‍താരയും വിഘ്നേശും ട്രെയിനില്‍ അനുവാദം നല്‍കിയിരുന്നു. ഇത്തരം സെല്‍ഫികള്‍ പലരും സോഷ്യല്‍ മീഡിയയില്‍ പോസ്റ്റ് ചെയ്തിട്ടുണ്ട്.