​’എല്ലാം വിധിയാണ്’: ഏഴ് പിഞ്ചുകുട്ടികളെ കൊലപ്പെടുത്തിയ ശേഷം നഴ്സ് ലൂസി സുഹൃത്തുക്കൾക്ക് അയച്ച സന്ദേശങ്ങൾ ഇങ്ങനെ

ഏഴ് നവജാതശിശുക്കളെ കൊലപ്പെടുത്തിയ നഴ്സ് ലൂസി ലെറ്റ്ബി കുറ്റക്കാരിയെന്ന് മാഞ്ചസറ്റർ ക്രൗൺ കോടതി കണ്ടെത്തിയിരുന്നു. കേസുമായി ബന്ധപ്പെട്ട് കൂടുതൽ വിവരങ്ങൾ പുറത്ത്. ബ്രിട്ടീഷ് ക്രിമിനൽ ചരിത്രത്തിലെ ഏറ്റവും ദൈർഘ്യമേറിയ വിചാരണകളിൽ ഒന്നായിരുന്നു ഏഴ് നവജാതശിശുക്കളെ കൊലപ്പെടുത്തിയതിനും ആറ് കുട്ടികളെ കൊല്ലാൻ ശ്രമിച്ചതിനും അറസ്റ്റിലായ നഴ്‌സ് ലൂസി ലെറ്റ്ബിയുടെ കേസ്. ഓരോ കുട്ടികളെയും കൊലപ്പെടുത്തിയ ശേഷം ലൂസി തന്റെ സഹപ്രവർത്തകയ്ക്ക് അയച്ച സന്ദേശങ്ങൾ ഹൃദയം ഭേദിക്കുന്നതും ലൂസിയുടെ ക്രൂരത വിവരിക്കുന്നതുമാണ്.

തിങ്കളാഴ്ചയാകും ഇവർക്ക് ശിക്ഷ വിധിക്കുക. പത്തുമാസത്തെ വിചാരണ നടപടികൾക്ക് ശേഷമാണ് തീവ്രപരിചരണ വിഭാഗത്തിലെ നഴ്സായിരുന്ന ലൂസി കുറ്റക്കാരിയാണെന്ന് കോടതി കണ്ടെത്തിയത്. 2015 ജൂണിനും 2016 ജൂണിനുമിടയിൽ കൗണ്ടസ് ഓഫ് ചെസ്റ്റർ ഹോസ്പിറ്റലിലെ 7 നവജാത ശിശുക്കളെയാണ് ലൂസി ക്രൂരമായി കൊലപ്പെടുത്തിയത്. അമിതമായി പാൽ നൽകിയും ഇൻസുലിൻ കുത്തിവെച്ചുമാണ് കുട്ടികളെ കൊലപ്പെടുത്തിയത്. നൈറ്റ് ഡ്യൂട്ടിക്കിടെയായിരുന്നു എല്ലാ കൊലപാതകം ലൂസി നടത്തിയിരുന്നത്.

ശിശുക്കളുടെ മരണത്തെത്തുടർന്ന് അവൾ തന്റെ സഹപ്രവർത്തകർക്ക് മെസേജുകൾ അയച്ചിരുന്നു. സംഭവത്തിൽ തനിക്ക് പങ്കില്ലെന്നും, മരണപ്പെട്ട കുഞ്ഞുങ്ങളെ ഓർത്ത് തനിക്ക് സഹതാപമുണ്ടെന്നും വരുത്തിത്തീർക്കാനായിരുന്നു ലൂസി ശ്രമിച്ചിരുന്നത്. കൗണ്ടസ് ഓഫ് ചെസ്റ്റർ ഹോസ്പിറ്റലിലെ നിയോനേറ്റൽ ഇന്റൻസീവ് തെറാപ്പി യൂണിറ്റിൽ (ITU) അധിക ഷിഫ്റ്റുകൾ ഏറ്റെടുക്കാൻ അവൾ സന്നദ്ധത അറിയിച്ചതായും സന്ദേശങ്ങൾ സൂചിപ്പിച്ചു. ബിബിസി റിപ്പോർട്ട് പ്രകാരം, ആശുപത്രിയിലെ ശിശുമരണങ്ങളുടെ പെട്ടെന്നുള്ള വർദ്ധനവിൽ താനും ആശങ്കയിലാണെന്ന് വരുത്തിത്തീർക്കാൻ, അസ്വസ്ഥമായ ടെക്സ്റ്റ് സന്ദേശങ്ങൾ ആയിരുന്നു ലൂസി സഹപ്രവർത്തകയായ സുഹൃത്തിന് അയച്ചിരുന്നത്.

ലൂസി ലെറ്റ്ബി തന്റെ 12 മാസത്തെ ഹോസ്പിറ്റലിലെ ഹീനമായ പ്രവർത്തനങ്ങളിൽ സഹപ്രവർത്തകർക്ക് അയച്ച സന്ദേശങ്ങൾ ഇങ്ങനെ;

ജൂൺ 9, 2015

ജൂൺ 8-ന്, ലെറ്റ്ബി തന്റെ ആദ്യത്തെ ഇരയെ കൊലപ്പെടുത്തി. ബേബി എ എന്ന് ഈ കുഞ്ഞിനെ വിളിക്കാം. ആ സംഭവത്തെത്തുടർന്ന്, താൻ സങ്കടത്തിലാണെന്ന് അറിയിക്കാനായി അവൾ സഹപ്രവർത്തകർക്ക് സന്ദേശമയച്ചു. ഡ്യൂട്ടി കഴിഞ്ഞ് വീട്ടിലേക്ക് തിരിച്ചുപോകാനും കുട്ടിയുടെ മാതാപിതാക്കളെ അഭിമുഖീകരിക്കാനും തനിക്ക് ബുദ്ധിമുട്ടുണ്ടെന്ന് മെസേജിലൂടെ സുഹൃത്തുക്കളെ അറിയിച്ചു. അവർക്ക് ഇരട്ടക്കുട്ടികൾ ആയിരുന്നു. ലൂസി ആക്രമിച്ച ബേബി ബിയും ഇവരുടേത് തന്നെയായിരുന്നു. ജൂൺ 11 ന് മുമ്പ് ആ കുട്ടിയേയും ലൂസി ആക്രമിച്ചു.

അവൾ പറഞ്ഞു: ഞാൻ ആ കുഞ്ഞിനെ മോർച്ചറിയിലേക്ക് കൊണ്ടുപോകുമ്പോൾ ഞങ്ങളുടെ കുഞ്ഞിനെ കൊണ്ടുപോകരുത് എന്ന് പറഞ്ഞ് കുഞ്ഞിന്റെ അച്ഛൻ നിലത്ത് വീണ് കരയുകയായിരുന്നു; ഇത് ഹൃദയഭേദകമാണ്. എനിക്ക് ചെയ്യേണ്ടി വന്നതിൽ വച്ച് ഏറ്റവും ബുദ്ധിമുട്ടുള്ള കാര്യമായിരുന്നു അത്.

ജൂൺ 13 2015

ജൂൺ 11 ന് ഇരട്ടക്കുട്ടികളിൽ രണ്ടാമത്തെ ആൾ കുഞ്ഞ് ബി-യേയും ലൂസി കൊലപ്പെടുത്തിയിരുന്നു. ശേഷം ജൂൺ 13 ന് ബേബി സി-യെ ലക്ഷ്യം വയ്ക്കുന്നതിന് തൊട്ടുമുൻപ് അവൾ ഒരു സഹപ്രവർത്തകയ്ക്ക് സന്ദേശം അയച്ചു: ഞാൻ മോനെക്കുറിച്ച് (എ കുട്ടിയുടെ മരണം) ചിന്തിക്കുന്നു. അതിനെ മറികടക്കാൻ… എന്റെ തലയിൽ നിന്ന് ആ കാഴ്ചകൾ മറികടക്കണമെങ്കിൽ ഞാൻ (റൂം) 1-ൽ ഉണ്ടായിരിക്കണമെന്ന് തോന്നുന്നു. ഇത് വിചിത്രമായി തോന്നാം, പക്ഷേ എനിക്ക് അങ്ങനെയാണ് തോന്നുന്നത്.

പിന്നീട് അവൾ കൂട്ടിച്ചേർത്തു: അവനെ കണ്ടവർക്ക് മനസിലാകും എന്റെ തലയിൽ എന്താണെന്ന്.

അവരുടെ സംഭാഷണം അവസാനിപ്പിച്ച് വെറും ആറ് മിനിറ്റിനുള്ളിൽ, ‘കുഞ്ഞ് സി’ ഗുരുതരാവസ്ഥയിലാവുകയും അധികം വൈകാതെ മരിക്കുകയും ചെയ്തു.

ജൂൺ 14, 2015:

തലേദിവസം രാത്രി സംസാരിച്ച അതേ സഹപ്രവർത്തകയുമായി ലെറ്റ്ബി മറ്റൊരു സംഭാഷണത്തിൽ ഏർപ്പെട്ടു.

അവൾ പറഞ്ഞു: ഞാൻ അവരെ രണ്ടുപേരെയും (ബേബി എ, ബേബി സി) കാണുന്നുണ്ട്. നമ്മൾ ചെയ്യുന്ന കാര്യങ്ങൾ ആരും കാണേണ്ടതില്ല. അത് ഹൃദയഭേദകമാണ്. പക്ഷേ അത് എന്നെക്കുറിച്ചല്ല. ഞങ്ങൾ അത് കൈകാര്യം ചെയ്യാൻ പഠിക്കുന്നു. എന്നെയോ മറ്റാരെയോ കുറിച്ചല്ല, കുഞ്ഞില്ലാതെ നടക്കേണ്ടി വരുന്നത് ആ പാവപ്പെട്ട മാതാപിതാക്കളാണ്.

2015 ജൂൺ 22

ബേബി ഡി മരിച്ചതിന്റെ പിറ്റേന്ന്, ലെറ്റ്ബി ഒരിക്കൽ കൂടി തന്റെ സഹപ്രവർത്തകർക്ക് മെസേജ് അയച്ചു.

അവൾ പറഞ്ഞു: ദൈനംദിന അടിസ്ഥാനത്തിൽ ഇത് വളരെയധികം പോസിറ്റീവുകളുള്ള അവിശ്വസനീയമായ ജോലിയാണ്. എന്നാൽ ചിലപ്പോഴൊക്കെ ഞാൻ ചിന്തിക്കാറുണ്ട്, എങ്ങനെയാണ് ഇത്തരം രോഗികളായ കുഞ്ഞുങ്ങൾ കടന്നുവരുന്നത്, മറ്റുള്ളവർ എങ്ങനെയാണ് പെട്ടെന്ന് അപ്രതീക്ഷിതമായി മരിക്കുന്നത്? അത് എങ്ങനെയായിരിക്കുമെന്ന് ഊഹിക്കാൻ പോലും കഴിയുന്നില്ല. എല്ലാം വിധിയാണെന്നാണ് ഞാൻ കരുതുന്നത്. എല്ലാത്തിനും ഒരു കാരണമുണ്ട്.

2015 ജൂൺ 30-ന് ഒരു നഴ്‌സ് കുഞ്ഞുങ്ങളുടെ ആരോഗ്യനിലയിലെ പെട്ടെന്നുള്ള മാറ്റങ്ങളെക്കുറിച്ച് ചോദ്യങ്ങൾ ഉന്നയിച്ചു.

നഴ്സ്: ആ രാത്രി എന്തോ കാര്യമായി നടന്നിട്ടുണ്ട്. ബേബി എ-യും മറ്റ് മൂന്ന് കുട്ടികളും പെട്ടന്ന് പോയതിന് പിന്നിൽ എന്തോ വിചിത്ര കാരണമുണ്ട്.

ലെറ്റ്‌ബി: ശരി, പക്ഷേ ബേബി സി ചെറുതും ഗർഭാശയത്തിൽ വ്യക്തമായും വളർച്ചക്കുറവ് ഉള്ളതുമായിരുന്നു. ബേബി ഡി സെപ്റ്റിക് ആണ്. എനിക്ക് ഉൾക്കൊള്ളാൻ പറ്റാത്തത് ബേബി എ-യുടെ മരണം ആണ്.

ഓഗസ്റ്റ് 4, 2015

പുലർച്ചെ, ബേബി ഇ മരിക്കുന്നു, കുഞ്ഞിന്റെ ഇരട്ട സഹോദരൻ ബേബി എഫ് വാർഡിൽ തന്നെ തുടരുന്നു. ഈ രണ്ട് കുട്ടികളെ പരിപാലിച്ചിരുന്നത് താൻ ആണോ എന്ന് ഒരു സഹപ്രവർത്തകൻ ലെറ്റ്ബിക്ക് ഒരു സന്ദേശം അയയ്‌ക്കുന്നു.

ലെറ്റ്ബി: ‘വാർത്തകൾ അതിവേഗം സഞ്ചരിക്കുന്നു. നിന്നോട് ആരാ ഇത് പറഞ്ഞത്?’

‘അതെ ഞാൻ ആയിരുന്നു ആ കുഞ്ഞുങ്ങളെ രണ്ട് പേരെയും പരിപാലിച്ചിരുന്നത്’.

നഴ്സ്: ‘എനിക്ക് അവന്റെ മാതാപിതാക്കളോട് ശരിക്കും വിഷമം തോന്നുന്നു, പക്ഷേ നിങ്ങളോടും. ഈയിടെ നിങ്ങൾക്ക് വളരെ വിഷമകരമായ സമയങ്ങൾ ഉണ്ടായിരുന്നു.’

ലെറ്റ്ബി: ‘എനിക്ക് ശരിക്കും ഒന്നും ചെയ്യാൻ കഴിഞ്ഞില്ല. ആ കുഞ്ഞിന് വൻ രക്തസ്രാവം ഉണ്ടായിരുന്നു. ഏത് കുഞ്ഞിനും സംഭവിക്കാം.

ഓഗസ്റ്റ് 5, 2015

ബേബി ഇ-യുടെ മരണത്തിന്റെ പിറ്റേന്ന്, ബേബി എ-ഫിന്റെ ആരോഗ്യനില ഗുരുതരമായി തുടർന്നു.

ലെറ്റ്ബി: ബേബി എഫ് നാളെ പോയേക്കാമെന്നതിനാൽ ഞാൻ ബേബി എഫിന്റെ മാതാപിതാക്കളോട് വിട പറഞ്ഞു. ബേബി എഫിന് ഞാൻ നൽകിയ സ്നേഹത്തിനും കരുതലിനും ഞാൻ അവർക്ക് നൽകിയ വിലയേറിയ ഓർമ്മകൾക്കും ഒരിക്കലും നന്ദി പറയാൻ കഴിയില്ലെന്ന് പറഞ്ഞ് അവർ രണ്ടുപേരും എന്നെ കെട്ടിപ്പിടിച്ചു കരഞ്ഞു. ഇത് ഹൃദയഭേദകമാണ്.

നഴ്‌സ്: ഇത് ഹൃദയഭേദകമാണ്, പക്ഷേ നിങ്ങൾ അനുകമ്പയോടെയും പ്രൊഫഷണലിസത്തോടെയും നിങ്ങളുടെ ജോലി ഏറ്റവും ഉയർന്ന നിലവാരത്തിൽ ചെയ്തു.

ലെറ്റ്ബി: അവർക്ക് അവനെ നഷ്ടപ്പെട്ടപ്പോഴും നമ്മളിൽ ആരെങ്കിലും ചെയ്തേക്കാവുന്ന കാര്യത്തിനും അവർ എന്നോട് നന്ദി പറയുന്നതിൽ എനിക്ക് സങ്കടമുണ്ട്. പക്ഷേ, അവർക്കായി ഞാൻ അത് ശരിയായി ചെയ്തു എന്നറിയുന്നതിൽ വളരെ സന്തോഷമുണ്ട്. എനിക്ക് വേണ്ടത് അത്രമാത്രം.

2015 സെപ്റ്റംബർ 26

ബേബി ജി-യെ കൊല്ലാൻ ശ്രമിച്ച് അഞ്ച് ദിവസത്തിന് ശേഷം ഒരു മാനേജരുടെ പ്രോത്സാഹജനകമായ പരാമർശത്തോട് ലെറ്റ്ബി പ്രതികരിച്ചു.

ലെറ്റ്‌ബി: എന്റെ റോളിനെക്കുറിച്ച് അടുത്തിടെ ഉണ്ടായ പോസിറ്റീവല്ലാത്ത ചില അഭിപ്രായങ്ങളെക്കുറിച്ച് നിങ്ങൾക്ക് അറിയാമെന്ന് ഞാൻ കരുതുന്നു. അതിനിടയിലും നിങ്ങളുടെ ഈ പ്രോത്സാഹനം എനിക്ക് സന്തോഷം പകരുന്നു. ഞങ്ങൾക്ക് ഞങ്ങളുടെ ജോലി ചെയ്യുന്നത് സന്തോഷകരമാണ്, കുഞ്ഞുങ്ങൾക്കും അവരുടെ കുടുംബത്തിനും വേണ്ടി ഞാൻ ഏറ്റവും മികച്ചത് തന്നെയാണ് ചെയ്തുകൊണ്ടിരിക്കുന്നതെന്ന് പ്രതീക്ഷിക്കുന്നു. ഇനിയും അത് തുടരും.

2015 ഒക്ടോബർ 13

ബേബി ഐ ഗുരുതരാവസ്ഥയിലായി. ലെറ്റ്ബി ഷിഫ്റ്റ് ലീഡറോട് അഭ്യർത്ഥിച്ചു; “ദയവായി അവളെ സൂക്ഷിക്കാൻ ഞാൻ ആഗ്രഹിക്കുന്നു.”

തുടർന്നുള്ള ആഴ്ച, ലെറ്റ്ബിയുടെ മറ്റൊരു രാത്രി ഷിഫ്റ്റിനിടെ, ബേബി ഐ മരിച്ചു.

ഏതാനും മാസങ്ങൾക്കുള്ളിൽ, ലെറ്റ്ബിയുടെ പരിചരണത്തിലുള്ള കൂടുതൽ ശിശുക്കൾ രോഗബാധിതരായി.

ജൂൺ 23, 2016

ലൂസി ലെറ്റ്ബി ബേബി ഒ-യെ കൊലപ്പെടുത്തി.

ജൂൺ 24, 2016

ലെറ്റ്ബി ബേബി പി-യെ കൊന്നു.

ജൂൺ 25, 2016

ലെറ്റ്ബി അവളുടെ ഡോക്ടർ സുഹൃത്തിന് സന്ദേശം അയച്ചു.

ലെറ്റ്ബി: ‘ഡോ ഗിബ്‌സ് ചോദിച്ചതിനെ കുറിച്ച് ഞാൻ വിഷമിക്കേണ്ടതുണ്ടോ?’

ഡോക്ടർ: ‘ഇല്ല. സാധാരണ നടപടിക്രമങ്ങൾ നടക്കുന്നുണ്ടെന്ന് ഉറപ്പുവരുത്താൻ അദ്ദേഹം ആവശ്യപ്പെടുകയായിരുന്നു.’

ഡോക്ടർ: പ്രദേശത്തുടനീളമുള്ള ഏതാനും നഴ്സുമാരിൽ ഒരാളാണ് നിങ്ങൾ (ഞാൻ മിക്കവാറും എല്ലായിടത്തും ജോലി ചെയ്തിട്ടുണ്ട്) എന്റെ സ്വന്തം കുട്ടികളോട് എനിക്ക് വിശ്വാസമുണ്ട്.

ജൂലൈ 6, 2016

ബേബി ഒ-യുടെയും ബേബി പി-യുടെയും മരണങ്ങൾ ചർച്ച ചെയ്യാൻ നടന്ന യോഗത്തെക്കുറിച്ചുള്ള വിവരങ്ങൾ ലെറ്റ്ബിയുമായി പങ്കുവെച്ചുകൊണ്ട് ഡോക്ടർ വെളിപ്പെടുത്തുന്നു: ‘ഇക്കാര്യം നിങ്ങൾ അറിഞ്ഞാൽ മതി. ആരോടും പങ്കുവെയ്ക്കാൻ നിൽക്കേണ്ട. നിങ്ങൾ വിഷമിക്കേണ്ട കാര്യമൊന്നുമില്ല. സ്റ്റാഫിന്റെയും കിറ്റിന്റെയും അടിസ്ഥാനത്തിൽ ചില ശുപാർശകൾ ഉണ്ടാകാൻ പോകുന്നു എന്നെ ഉള്ളൂ. ആശങ്കപ്പെടാനുള്ളതായി ഒന്നുമില്ല.

ജൂലൈ 7, 2016

ഡോക്ടർ: ‘നിങ്ങൾ ഒന്നും പറയില്ലെന്ന് എനിക്കറിയാം; ഈ ഇമെയിൽ ഞങ്ങൾക്കിടയിൽ നിലനിൽക്കണം; അത് ശരിയാണോ?’

ലെറ്റ്ബി: ‘തീർച്ചയായും. 100%’.

ജൂലൈ 15, 2016

എല്ലാ സ്റ്റാഫ് അംഗങ്ങൾക്കും ഒരു ഇമെയിൽ അയയ്ക്കുന്നു, യൂണിറ്റിനുള്ളിലെ മരണങ്ങളെ കേന്ദ്രീകരിച്ചുള്ള ഒരു ബാഹ്യ അവലോകനത്തിനുള്ള തയ്യാറെടുപ്പിനായി അവർക്ക് ക്ലിനിക്കൽ മേൽനോട്ടം ലഭിക്കുമെന്ന് അവരെ അറിയിക്കുന്നു.

2012-നും 2016-നും ഇടയിൽ 4,000-ലധികം നിയോ-നാറ്റൽ യൂണിറ്റ് അഡ്മിഷനുകൾ പരിശോധിച്ച്, കൗണ്ടസ് ഓഫ് ചെസ്റ്ററിലെയും ലിവർപൂൾ വിമൻസ് ഹോസ്പിറ്റലിലെയും ലെറ്റ്ബിയുടെ മുഴുവൻ കാലാവധിയും പോലീസ് അന്വേഷിച്ചു. അവളുടെ കേസ് ബ്രിട്ടനിലെ കുപ്രസിദ്ധ മെഡിക്കൽ കൊലപാതകികളായ ഡോക്ടർ ഹരോൾഡ് ഷിപ്പ്മാൻ, നഴ്സ് ബെവർലി അല്ലിറ്റ് എന്നിവരുടെ ഓർമ്മകളെ പുനരുജ്ജീവിപ്പിച്ചു.

അതേസമയം, യാതൊരു ആരോഗ്യപ്രശ്നങ്ങളും ഇല്ലാതിരുന്നിട്ടും സ്ഥിരമായി കുട്ടികൾ മരണപ്പെടുന്നത് നിയോ-നാറ്റൽ യൂണിറ്റിൽ ജോലി ചെയ്യുന്നവരെ മുഴുവൻ സംശയത്തിന്റെ നിഴലിൽ വരുത്തിയിരുന്നു. ഒരു തുമ്പും അവശേഷിപ്പിക്കാത്ത തരത്തിലുള്ള കൊലപാതക രീതികളായിരുന്നു ലൂസിയുടേത്. ലൂസി അടക്കമുള്ള നഴ്‌സുമാരെ അവരറിയാതെ ആശുപത്രിയിലെ ഡോക്‌ടർമാർ നിരീക്ഷിച്ചു. ഇവരുടെ വീടുകളിൽ പരിശോധന നടത്തി. ഒടുവിൽ അവർ തേടിയ ആൾ ലൂസിയാണെന്ന് തിരിച്ചറിയുകയായിരുന്നു.

പരാതി ലഭിച്ചതോടെ പോലീസ് അന്വേഷണം ആരംഭിച്ചു. കുട്ടികളെ നോക്കാൻ എനിക്കാകില്ലെന്നും, ഞാൻ പിശാച് ആണെന്നുമുള്ള കുറിപ്പ് ലൂസിയുടെ വീട്ടിൽ നിന്ന് പോലീസ് കണ്ടെത്തി. ഓരോ തവണയും കുട്ടികൾ മരിക്കുമ്പോൾ അന്നത്തെ ഷിഫ്റ്റിലുണ്ടായിരുന്നത് ലൂസിയായിരുന്നു എന്നതാണ് സംശയം ശക്തമാക്കിയതും അന്വേഷണം യുവതിയിലേക്ക് എത്തിയതും. വിശദമായ പരിശോധനയിൽ കൊല്ലപ്പെട്ട കുട്ടികളുടെ മാതാപിതാക്കളുടെ സമൂഹമാധ്യമങ്ങളിലെ അക്കൗണ്ടുകൾ യുവതി പരിശോധിച്ചിരുന്നതായും കണ്ടെത്തി. ലെറ്റ്ബിയെ രണ്ട് തവണ അറസ്റ്റ് ചെയ്യുകയും വിട്ടയക്കുകയും ചെയ്തു.

2022 ഒക്ടോബറിലാണ് കേസിൽ വിചാരണ ആരംഭിച്ചത്. തനിക്ക് കുട്ടികൾ എന്ന് പറഞ്ഞാൽ ജീവനാണെന്നും ജോലിയിൽ ആത്മാർത്ഥത ഉള്ള ആളാണ് താനെന്നുമായിരുന്നു ലൂസി കോടതിയിൽ വാദിച്ചിരുന്നത്. കുഞ്ഞുങ്ങളെ വേദനിപ്പിക്കുന്നതോ വേദനിപ്പിക്കാൻ ആഗ്രഹിക്കുന്നതോ ആയ കാര്യങ്ങൾ തനിക്ക് ചെയ്യാൻ കഴിയില്ലെന്നും പറഞ്ഞ് ലൂസി കോടതിയിൽ ‘നല്ല പിള്ള’ ചമയാൻ ശ്രമിച്ചു. ആശുപത്രിക്കാരുടെ വീഴ്ചകൾ മറയ്ക്കാൻ നാല് കൺസൾട്ടന്റുമാരുടെ ഒരു സംഘം തന്റെമേൽ കുറ്റം ചുമത്താൻ ഗൂഢാലോചന നടത്തിയതായി വിചാരണ കാലയളവിൽ അവർ ആരോപിച്ചിരുന്നു.