രാഹുൽ ഗാന്ധിയ്ക്ക് നോട്ടീസ് അയച്ച് ഡൽഹി സർവകലാശാല
ഡൽഹി സർവകലാശാലയിലെ പിജി പുരുഷ ഹോസ്‌റ്റലിലേക്ക് കഴിഞ്ഞയാഴ്‌ച നടത്തിയ അപ്രതീക്ഷിത സന്ദർശനത്തിന്റെ പേരിൽ ബുധനാഴ്‌ച രാഹുൽ ഗാന്ധിക്ക് സർവകലാശാല അധികാരിയുടെ നോട്ടീസ്. കഴിഞ്ഞ വെള്ളിയാഴ്‌ച കോൺഗ്രസ് നേതാവ് സർവകലാശാലയിലെ പോസ്‌റ്റ് ഗ്രാജ്വേറ്റ് മെൻസ് ഹോസ്റ്റൽ സന്ദർശിക്കുകയും ചില വിദ്യാർത്ഥികളുമായി ആശയവിനിമയം നടത്തുകയും അവരുമായി ഉച്ചഭക്ഷണം കഴിക്കുകയും ചെയ്‌തതിന് പിന്നാലെയാണ് നടപടി.
“ഇസഡ് പ്ലസ് സുരക്ഷയുള്ള ഒരു ദേശീയ പാർട്ടിയുടെ നേതാവിൽ നിന്ന് ഇത്തരമൊരു പെരുമാറ്റം അന്തസ്സിന് നിരക്കാത്തതാണ്” എന്ന് നോട്ടീസിൽ പറയുന്നു. സംഭവം അതിക്രമത്തിനും നിരുത്തരവാദപരമായ പെരുമാറ്റത്തിനും തുല്യമാണെന്ന് യൂണിവേഴ്‌സിറ്റി പ്രോവോസ്‌റ്റ് കെപി സിംഗ് ഗാന്ധിക്ക് അയച്ച രണ്ട് പേജുള്ള കുറിപ്പിൽ പറയുന്നു.
ഭാവിയിൽ അത്തരത്തിലുള്ള നടപടി സ്വീകരിക്കുന്നതിൽ നിന്ന് രാഹുൽ ഗാന്ധി പിന്മാറണമെന്നും നോട്ടീസിൽ ആവശ്യപ്പെടുന്നു. മൂന്ന് വാഹനങ്ങൾ സഹിതം ഹോസ്റ്റൽ പരിസരത്തേക്ക് ഗാന്ധിയുടെ “അപ്രതീക്ഷിതമായ പ്രവേശനം” ഹോസ്‌റ്റലിലെ നിർദിഷ്‌ട നിയമങ്ങൾ ലംഘിച്ചതായി പ്രൊവോസ്‌റ്റ് പറഞ്ഞു.
അറിയിപ്പിൽ, പ്രൊവോസ്‌റ്റ് ഹോസ്റ്റലിന്റെ വിവരങ്ങളുടെയും നിയമങ്ങളുടെയും ഹാൻഡ്‌ബുക്കിന്റെ റൂൾ 15.13 ഉദ്ധരിച്ചു: “ഹോസ്റ്റൽ പരിസരത്ത് അക്കാദമിക്, റസിഡന്റ്സ് കൗൺസിൽ പ്രവർത്തനങ്ങൾ ഒഴികെയുള്ള ഒരു പ്രവർത്തനത്തിലും ഒരു താമസക്കാരനും ഏർപ്പെടരുത്.”
“06.05.2023ന് ഡൽഹി യൂണിവേഴ്‌സിറ്റിയിലെ ഡീൻ സ്‌റ്റുഡന്റ്സ് വെൽഫെയർ ആൻഡ് പ്രോക്ടറുടെ സാന്നിധ്യത്തിൽ ചേർന്ന ഹോസ്റ്റലിന്റെ മാനേജ്മെന്റ് കമ്മിറ്റി, ഇസഡ് സുരക്ഷയുള്ള ഒരു ദേശീയ പാർട്ടിയുടെ നേതാവിൽ നിന്ന് ഇത്തരമൊരു പെരുമാറ്റം അന്തസ്സിന് നിരക്കാത്തതാണെന്ന് ഏകകണ്‌ഠമായി നിലപാടെടുത്തു” നോട്ടീസിൽ പരാമർശിച്ചു.
“നിർദ്ദിഷ്‌ട നിയമങ്ങൾക്ക് വിരുദ്ധമായി നടക്കുന്ന ഏതൊരു പ്രവർത്തനവും നിർത്താനുള്ള അവകാശം ഹോസ്റ്റലിന്റെ അഡ്മിനിസ്‌ട്രേഷനിൽ നിക്ഷിപ്‌തമാണെന്ന് പ്രത്യേകം പറയേണ്ടതില്ലല്ലോ. ഹോസ്റ്റലിൽ ശരിയായ അച്ചടക്കം പാലിക്കുന്നതിന്റെ ഒരു പ്രധാന ഭാഗമായി, ഇത് ഹാൻഡ്‌ബുക്ക് ഓഫ് ഇൻഫർമേഷൻ ആൻഡ് റൂൾസ് ഓഫ് ദ ഹോസ്റ്റൽ 15.13ൽ വ്യക്തമായി വ്യവസ്ഥ ചെയ്‌തിട്ടുണ്ട്” നോട്ടീസിൽ പറയുന്നു.
അതിനിടെ, അതിക്രമവും നിരുത്തരവാദപരമായ പെരുമാറ്റവും നടത്തിയ സംഭവത്തെ ഹോസ്റ്റൽ മാനേജ്മെന്റ് കമ്മിറ്റി ചെയർമാനും മറ്റ് അംഗങ്ങളും അപലപിച്ചു. “കൂടാതെ, ഇത്തരമൊരു സംഭവം ആ സമയത്ത് ഹോസ്റ്റലിൽ ഉണ്ടായിരുന്ന എല്ലാ വ്യക്തികളെയും ഗുരുതരമായ അപകടസാധ്യതയിലേക്ക് നയിച്ചു. മേൽപ്പറഞ്ഞ കാര്യങ്ങൾ കണക്കിലെടുത്ത്, നിങ്ങൾ അത്തരം അനിഷ്ടകരമായ നടപടികളിൽ നിന്ന് വിട്ടുനിൽക്കേണ്ടതുണ്ട്, ഹോസ്റ്റൽ താമസക്കാരുടെയും ജീവനക്കാരുടെയും അധികാരികളുടെയും സുരക്ഷിതത്വത്തിനും വേണ്ടി” കുറിപ്പിൽ പറയുന്നു.
നേരത്തെ രാഹുൽ ഗാന്ധിയുടെ സന്ദർശനത്തിന് ഒരു ദിവസത്തിന് ശേഷം ശനിയാഴ്‌ച, ഡൽഹി സർവകലാശാല വിഷയത്തിൽ പ്രസ്‌താവന പുറപ്പെടുവിച്ചിരുന്നു. അപ്രതീക്ഷിതവും അനധികൃതവുമായ പ്രവേശനം ഹോസ്റ്റൽ അന്തേവാസികൾക്കും നേതാവിനും ഗുരുതരമായ സുരക്ഷാ ആശങ്കകൾ ഉയർത്തുന്നതാണ്. ഇത്തരം സംഭവങ്ങൾ ഉണ്ടാകാതിരിക്കാൻ ആവശ്യമായ നടപടികൾ സർവകലാശാല അധികൃതർ സ്വീകരിക്കുമെന്നും ഭാവിയിൽ ഇത് ആവർത്തിക്കാതിരിക്കാൻ ശ്രദ്ധിക്കുമെന്നും പ്രസ്‌താവനയിൽ പറഞ്ഞു.