ആകാശ് മിശ്ര ഹൈദരബാദ് വിടും; പിന്നാലെകൂടി സൂപ്പർക്ലബുകൾ

ഇന്ത്യൻ സൂപ്പർ ലീ​ഗ് ക്ലബ് ഹൈദരബാദ് എഫ്സിയോട് വിടപറയാൻ ആകാശ് മിശ്ര. സീസൺ അവസാനിക്കുന്നതോടെ ഈ ലെഫ്റ്റ് ബാക്ക് ക്ലബ് വിടും. പരിശീലകൻ മനോലോ മാർക്വെസ് ഇന്ന് സൂപ്പർകപ്പ് മത്സരശേഷം ഇക്കാര്യം സ്ഥിരീകരിച്ചു.

21-കാരനായ ആകാശ്, സമീപകാലത്തെ ഹൈദരബാദിന്റെ കിടിലൻ കുതിപ്പിൽ നിർണായക പങ്ക് വഹിച്ച താരമാണ്. സ്ഥിരതയാർന്ന പ്രകടനം കാഴ്ചവച്ച ആകാശ് ഇന്ത്യൻ ദേശീയ ടീമിലേയും സ്ഥിരം സാന്നിധ്യമാണ്. 2020 മുതൽ ക്ലബിലെ സ്ഥിരം സാന്നിധ്യമായ ആകാശ് ഇതുവരെ 66 മത്സരങ്ങളിൽ ക്ലബ് ജേഴ്സിയണിഞ്ഞു.2021-22 സീസണിൽ ഹൈദരബാദ് ഐഎസ്എൽ കിരീടമുയർത്തിയപ്പോൾ ആകാശിന്റെ സേവനം നിർണായകമായിരുന്നു.

എടികെ മോഹൻ ബ​ഗാനെതിരെ നടക്കുന്ന ഏഎഫ്സി കപ്പ് പ്ലേ ഓഫ് പോരാട്ടമാണ് ഹൈദരബാദിന് സീസണിലിനി ശേഷിക്കുന്നത്. ഇതിനുശേഷം താരം ക്ലബ് വി‌ടും. ആകാശിനെ സ്വന്തമാക്കാൻ മോഹൻ ബ​ഗാൻ, മുംബൈ സിറ്റി എന്നീ ക്ലബുകളാണ് രം​ഗത്തുള്ളതെന്നാണ് ജേണലിസ്റ്റ് മാർക്കസ് മെർഹുലാവോ ട്വീറ്റ് ചെയ്യുന്നത്. കരാറിൽ രണ്ട് വർഷം കൂടി ബാക്കിയുള്ളതിനാൽ വൻ ട്രാൻസ്ഫർ തുക ആകാശിനായി ക്ലബുകൾ മുടക്കേണ്ടിവരും.